LAOAG CITY – Kalikagum ti City Health Office a maitultuloy ti pannakaipaay ti insentibo kadagiti ubbing nga agpabakuna kontra iti Human Papillomavirus.
Segun ken ni Dr. Rodrigo Catcatan, mangidadaulo ti City Health Office a daytoy nga ideya ket namunganay kalpasan iti naiwayat nga Human Papillomavirus vaccination ken cervical cancer screening iti Ilocos Norte Centennial Arena idi Hulio 1 agingga iti 3 no sadinno a dagiti nakipagpaset ket naipaayan ti dua a ribu a pisos.
Inbatadna a nakisarita daytoy ken ni Mayor James Bryan Alcid no mabalin a mailatangan ti pundo daytoy tapno maitultuloy uray maysa a ribu a pisos iti kada estudiante.
Babaen iti daytoy, inlawlawagna nga ad-adda a magutigot dagiti agad-adal nga agpabakuna nangruna ket nababa ti vaccination rate ditoy siudad ti Laoag iti napalabas a tawen.
Kunana a basar iti pammilin ti Department of Health ket kasapulan a 90 a porsiento ti populasion dagiti agtawen ti 9 agingga iti 14 a babbai ti mabakunaan a kaibatugan ti 2,700 a babbai.
Innayonna a basar iti naglabas a vaccination campaign-da ket adda pay laeng ti 1,500 ti nabakunaan isu a namnamaenna a mapatgan daytoy a kiddaw ti City Health Office.
