LAOAG CITY – Maluksaw ni Mrs. Ruby Bunalade, city planning and development officer ditoy siudad iti saan a pannakaaprar ti Annual Investment Plan (AIP).
Segun ken ni Bunalade, ti AIP ket isu ti tulbek tapno maaprubaran met ti Annual Budget ditoy siudad.
Nu pay kasta, gapu iti sumagmamano a rason ket saan a naaprubaran ti AIP.
Immuna iti daytoy, inpakaammo ni Bunalade nga idi Mayo 25 ket nagturong da ken ni bise Mayor Vicentito Lazo kadua na ni Sangguniang Panlungsod Handy Lao.
Kuna na a dita a dimmawat da ti opinion seknan iti pannakaurnos ti AIP ken isu ti naidasar iti session.
Kabayatanna, inbatad na nga iti isu met laeng nga aldaw ket naisubli kadakuada ti AIP manipod iti SP.
Inpakaammo na nga idi Mayo 27 ket nagtataripnong da kadua da ni Mayor Keon ken dita naadaptar ti resolusyon a nangadaptar iti pannakarebisar ti AIP.
Nu pay kasta, inbunannag na nga iti laksid nga adon dagiti inaramid da para iti AIP ket saan latta nga inaprubaran ti konseho, banag a pakaluksawan na.
Dinakamat ni Bunalade a gapu iti saan a pannakaaprubar ti AIP nga isu met ti rason iti pannakaitantan ti pannakaaprubar ti Annual Budget ket ado a proyekto ken programa iti siudad ti maapektaran.
