LAOAG CITY –Impakaammo ni Ms.Janet Retamal, ti City Population Commission (City PopCom) officer a kalikagumda a maipangato ti allowance a maipapaay kadagiti teenage mothers ditoy siudad ti Laoag.
Segun kenkuana, tapno maaramid daytoy ket kasapulanda pay ti umiso a datos tapno mapatgan ti posibilidad a maipangato ti allowance nangruna no ado ti bilang dagiti teenge mothers a mabenepisiaran iti siudad.
Kunana a saan a simple ti financial assistance nudiket adda ti kondision a masurot iti babaen ti Conditional Financial Assistance (CFA).
Inlawlawagna a ti tulong ket nairanta para kadagiti kasapulan ti ubing kas iti gatas, diaper ken dadduma pay a kangrunaan a masapul ti annak.
Mainaig iti daytoy, mabalin py a mausar ti tulong para iti salun-at ti ina ken anak, a pakairamanan ti edukasion daytoy.
Inpakaammona, a no agtultuloy ti panagadal ti ubing, mabalin pay a mairaman ti allowance a para iti panagadalna.
Impetteng ni Retamal a saan a maipaay ti financial assistance a magasto iti aniaman a kayatda ngem nudiket gagemda ti makatulong iti basic needs dagiti ina ken annakda, nangruna ta adu kadagiti teenage mother manipud ti pamilya nga addaan iti limitado a pagbiagan.
Kinunana, a daytoy ket mangipakita a ti programa ket panggepna met a makatulong iti panangpasayaat iti biag dagiti ubbing nga inna.
Immunan iti daytoy ti pannakaisyuwat pay ti panagsanay dagiti teenage mothers iti babaen ti panagsursuro ti manicure ken pedicure a gagemna a mapasayaat dagiti biag dagitoy ken pangnayon ti pagbiaganda.
Innayonna a saanda laeng nga agpokus iti panangipaay ti financial assistance nudiket ti dadakkel nga oportunidd a makatulong kenkuada ken ti pamiliada a mangpataud ti naan-anay a pagbiagan ti inaldaw.
