LAOAG CITY – Manamnama nga agturong ti City Tourism Office iti Brgy. Bacsil South ditoy ciudad ti Laoag tapno kasarita dagiti opisyales ti nadakamat a barangay.
Daytoy ket mainaig iti maipagarop a malalaukan ti danom dagiti suka a produkto ti nadakamat a barangay.
Segun kenni Atty. Charito Malicad, ti mangidadaulo iti City Tourism Officer, saan pay a naidanon kenkuada daytoy a banag ken naamoan laeng ti opisina na idi natratar daytoy iti konseho.
Mainaig iti daytoy, inbatad na nga agturong danto manen iti nasao a barangay tapno kasarita dagiti opisyales.
Nagballaag a no mapaneknekan nga adda ti kinapudno na ti alegasyon ket idanun da iti maseknan nga opisina a makatulong tapno masolbar ti problema.
Maipalagip nga immunan nga indasar iti konseho ditoy ciudad nga adda ti maipagarop a nakarikna iti saan a nasayaat iti bagna kalpasan ti panangusar da ti suka nga agapo iti nadakamat a barangay.
