LAOAG CITY – Itandudo ti City Tourism Office ti ad-adda pay a pannakapadur-as dagiti produkto a maar-aramid babaen ti kawayan ditoy ciudad ti Laoag.
Daytoy ti inbatad ni Atty. Charito Malicad, ti mangidadaulo ti City Tourism Office ditoy ciudad.
Segun kenni Atty. Malicad, plano da a padur-asen pay ti produkto manipud iti kawayan tapno ad-adda a maiyam-ammo iti publiko wenno iti sabali a lugar.
Kunana a planwen da a nasayaat no ania pay a wagas ti maitulong da iti nadakamat nga industriya gapu ta makitana no kasano iti kinapintas dagitoy a pagsapolan dagiti umili ditoy ciudad.
Basar pay ken ni Atty. Malicad, mangipatungpal danto pay iti panagsanay dagiti bamboo weavers tapno ad-ado pay dagiti maaramid da a produkto kas iti bag, kallugong, basket ken dadduma pay.
Maipalagip a pormal a nalukatan ti Bamboo products display center iti Brgy. 40 Balatong ditoy ciudad ti Laoag iti kallabes.
