LAOAG CITY – Nangipatulod ti surat ti City Tourism Office ditoy siudad ti Laoag iti Google Philippines tapno ipaplastar iti google map a nakalokasionan ti Laoag Sand Dunes.
Daytoy ket kalpasan a naruay kadagiti turista ti maul-ulaw wenno maiyaw-awan kabayatan iti panagturongda iti nasao a lugar.
Segun ken ni Atty. Charito Malicad, mangidadaulo ti nasao nga opisina, daytoy a banag ket inpakaammo kenkuana dagiti operators iti 4by4 ti Laoag Sand Dunes.
Inbatadna nga adda dagiti report manipud kadagiti turista a no i-search-da ti Laoag Sand Dunes iti google map ket sabali ti agparang wenno agpakita.
Nupay kasta, kunana nga insigidada a nagsurat iti Google Philippines tapno maiyalisto a maiplastar ken iti agdama ket maiyur-uray ti agbalin a sungbat dagitoy.
