LAOAG CITY – Saan a kasapulan iti panagal-alisto iti panangitandudo kadagiti tourism spot ditoy siudad ti Laoag kangrunaanna iti Laoag Sand Dunes.
Daytoy ti nagbalin a sungbat ni Atty. Charito Malicad, mangidadaulo ti City Tourism Office iti kalikagum ti Chairman ti Committee on Tourism para iti ad-adda a pannakaitandudo ti Laoag Sand Dunes.
Segun ken ni Malicad, addan ti immuna a pannakisaritana kadagiti operator ti 4 by 4 iti Laoag Sand Dunes tapno agtataripnong maipanggep iti panangitandudo pay ti lugar ken no ania pay dagiti kurang a makitada.
Inbatadna a sakbay nga agtignay dagitoy nga itandudo ket kasapulan pay laeng a mangngegan kadagiti operators no ania dagiti agbalbalin a problema iti nasao a lugar tapno masolusion daytoy.
Inlawlawagna a manarimaan ti panangiplastarda ti iskedyul iti panagtataripnong dagiti operators ti Laoag Sand Dunes para iti napinpintas ken systematic a pannakaitandudona daytoy.
Innayon ti City Tourism Officer a saan a nasken nga agal-alisto gapu ta nabiit pay daytoy a nagtugaw ngem kunana nga aramidenna ti amin a kabaelanna tapno mapapintas ken mapapigsa pay dagiti tourism destination ditoy siudad ti Laoag.
Maipalagip a gagem ti Chairman ti Committee on Tourism a mapapintas pay ti Laoag Sand Dunes ken maiyam-ammo daytoy iti kaaduan.
