LAOAG CITY- Inpakammo ni Dr. Samantha Licudine ti City Veterinarian nga awan ti aniaman a nairekord opisina da a kaso t Q-fever ditoy ciudad ti Laoag.
Segun kenkuana ti Q-fever ket maysa nga isolated case iti southern Luzon ken namunganay daytoy gapu iti panag-import ti kalding manipud iti sabali a pagilyan.
Mainaig iti daytoy, nagkiddaw ni Licudine iti publiko a no mabalbalin ket ipaayan ti naan-anay a bitamina dagiti dingwen da wenno ipakonsultar iti Veterinary Office dagiti dingwen da nu madlaw da nga adda ti sagsagabaen dagitoy a sakit.
Immun-una ngem iti daytoy, inpetteng ti City Veterinarian a kadaytoy a panawen ti panaglalamiis ket kangrunaan a mapaspasaran dagiti dingwen kas iti kalding ken baka ti panateng ken uyek.
Kabayatanna, inpasigurado na nga agtultuloy ti panagbisita ti City Veterinary Office kadagiti nagduduma a barangay aglalo kadagiti agkidkiddaw ti tulong tapno mangiwayat ti libre a medical mission kadagiti dingwen.
