LAOAG CITY – Inpakaammu ni Dr. Rodrigo Catcatan, ti City Health Officer dituy ciudad ti Laoag a saan pay a covid free ti ciudad.
Basar iti datus manipud idi Enero 1 agingga Disiembre 7, 2024, umaboten iti 757 dagiti indibidwal a nairekord a nagpositibo ti Covid-19 ditoy ciudad ti Laoag.
Segun ken ni Dr. Catcatan, ita a bulan ti Disiembre ket adda maysa nga indibidual, manipud iti Barangay Araniw, ditoy ciudad a nairekord a positibo iti nasao a sakit.
Gapu iti daytoy, pinasingkedan ni Catcatan a no adda agpositibo ket insigida nga imandarda ti pannaka-isolate ti indibidual, agraman dagiti nakalangen na.
Kunana a dakkel ti posibilidad a kaadwan kadagiti agpospositibo ket dagiti mahilig nga agpasyar kadagiti sabali a lugar aglalo kadagiti pagdudupudupan ti tattao.
Ngem nu pay kasta, inrakurakna nga ita a panawen ket saanen a kas iti dati ti sintomas ti covid, no di ket mabalin a simple laeng nga uyek ngem sintomas gayamen ti Covid.
Gapu iti daytoy, binalakadan ni Catcatan ti publiko nga aggannad ken ugalien latta ti panagisuot ti facemask aglalo ita a panawen ti panaglalamiis nga ad-adda nga aktibo ti nasao a virus.
