LAOAG CITY – Naragsak nga inpakaammo ni P/Lt.Col. Ryan Retotar, Hepe ti Laoag City Police Station a generally peaceful ti naisayangkat a Civic Military Parade ti Pamulinawen Festival ditoy siudad ti Laoag.
Segun kenkuana, adda ti sumurok 170 a pulis ti naiwaras tapno agbantay iti aglawlaw ken adda pay ti sumurok 100 a force multipliers a timmulong tapno mapagtalinaed ti linak, urnos ken talna.
Inbatadna nga awan met dagiti nadagsen wenno seryoso a napasamak kabayatan iti umuna nga aldaw iti pannakarambak ti fiesta ditoy siudad ti Laoag.
Kabayatanna, inrakurak ni Mayor James Bryan Alcid a quality over quantity ti nagbalin a target-da iti kaliplippas a civic military parade kagiddan iti panangrambak ti Pamulinawen Festival.
Inlawlawagna nga apaman a nalpas ti pannakaisayangkat ti parada ket insigida a nadalusan iti aglawlaw iti sentro ditoy siudad ti Laoag gapu kadagiti nakita a basura.
