LAOAG CITY – Inbatad ni PMaj. Eduardo Santos, ti hepe ti PNP-Pagudpud a saan pay a madalyasatan ti kalsada iti paset ti Sitio Bangquero iti Brgy. Pancian.
Daytoy ket gapu iti landslide wenno ti napasamak a panagreggaay ti daga iti nasao a lugar.
Segun ken ni Santos, agtultuloy ti clearing operations iti nasao a lugar ken adda dagiti motorista a nastranded.
Nu pay kasta, inpetteng na nga awan ti nadangran idi napasamak ti landslide.
Innayun na a dagiti stranded ket nagtalinaed iti border control ken maipaay ti aniaman a kasapulan dagitoy bayat a saan pay a madalyasatan ti kalsada.
Immunan nga inbunannag ni Santos a saan a masinunuo nu tuloy-tuloy ti panagsardeng ti landslide gapu ta agtultuloy met pay laeng ti panagtudtudo.
Kabayatanna, kuna ti hepe a naiget ti panagbantay dagiti otoridad iti nasao a lugar tapno maliklikan ti aniaman a sakuna.