LAOAG CITY – Nasugatan dagiti dua a lallaki kalpasan ti pannakapalto-paltog da babaen kadagiti saan pay a nabigbig a dua a suspek a nakamotorsiklo idiay Barangay Baay iti ciudad ti Batac, Ilocos Norte.
Nabigbig dagiti biktima a da Teodoro Dagupion, process server ti RTC Branch 65 ditoy ciudad ti Laoag, residente idiay ili ti Badoc ken ti nag-drive a ni Randel Villaluz, maysa a clerk of court iti Branch 65.
Segun kenni Police Chief Inspector Rodelio Santos, chief of police ti PNP-Batac, dagiti suspek ket immabay iti kotse a nagluganan dagiti biktima.
Inbatad na a nakamaneho pay laeng ni Villaruz ken nakaadayo agingga iti 100 a metro manipud iti mismo a nakapasamakan ti pammaltog.
Nupay kasta, inbatad ni Santos a basar iti maysa a nakakita ket maipagarop a sinurot pay laeng dadgiti suspek dagiti biktima sakbay a naglibas.
Gapo iti daytoy, nagsagaba ni Villaruz ti tama ti paltog iti akin-kannawan a luppo na ken akin-kannawan a paset ti bagi na idinto a ni Dagupion ket iti sango a paset ti bagi na.
Rumrumwar a dagiti biktima ket naggapo iti korte ditoy ciudad ti Laoag idi napasamak ti insidente.
