LAOAG CITY – Inpakaammo ni Mr. Gervy Gumarit, mangidadaulo iti Communications and Media Office ditoy probinsia a manamnama a maiwayat ti State of the Region Address ni Gov. Matthew Marcos Manotoc inton Biernes, Hunio 28 ita a tawen.
Inbatadna a daytoy ket kas paset iti panagtakemna a kas Chairperson of the Regional Development Council 1.
Inlawlawag ni Gumarit a daytoy ket maysa nga economic group a mangpartuat kadagiti aktibidad ken programa a mangpapintas ti estado ti ekonomiya ditoy rehion 1.
Innayonna nga iti agdama ket saanna pay a masinunuo no ania dagiti planona ken accomplishemnets nga ipakaamo ti Gobernador iti publiko nangruna iti rehion uno ti agbalin nga organizing committee.
Inrakurakna, dagiti manamnama a makipagpaset iti nasao nga aktibidad ket dagiti regional agencies ken dagiti amin a gobernador iti rehion uno.
Inpakaammona a ti nasao nga aktibidad ket maiwayat iti ala una timalem iti Ariana Hotel iti ili ti Bauang iti probinsiya ti La Union.
Kabayatanna, dagiti saan a makapan iti La Union ket mabalin laeng a buyaen ti State of the Region Adres iti online streaming.
