LAOAG CITY – Sumango ita a lawas iti audit phase ti impeachment trial kontra ken ni Vice President Sara Duterte kalpasan a simmango idi naudi a lawas dagiti testigo a nangpaneknek iti panangiruar ken pannakai-wirthraw ti P612.5 million confidential funds ti Office of the Vice President ken Department of Education.
Segun ken ni Tingog Party-list Rep. Jude Acidre, sumaruno a sumango iti impeachment court dagiti testigo manipud iti Commission on Audit (COA) para iti testimoniada mainaig iti panang-audit ti confidential funds.
Mainaig iti daytoy, manamnama nga umuna nga agtestigo da dati a Commission on Audit COA State Auditor Roderick Wamil ken ti manarimaan nga Intelligence and Confidential Funds Audit Office Supervising Auditor Celiane May Del Campo.
Malaksid kadakuada, manamnama pay nga agtestigo ni House Legislative Information Resources Management Department Director Marivic Pareja.
Gapu iti daytoy, inbatad ni Acidre a manipud iti panangsapol iti naggapuan ken panangi-withraw ti pondo, umakaren ti prosekusion iti pannakaitalantan ti alegasion mainaig iti panangigasto ken panang-liquidate ti nasao a pondo.
Maipalagip nga idi naudi a lawas, timmestigo ti dua a dati nga opisial ti Land Bank a segun kadakuada, ti P612.5 million confidential funds ket manipud iti National Treasury ken nai-withraw daytoy babaen iti pito a tseke.
Manamnama pay a talantanen dagiti Commission on Audit (COA) witness ti nagbalin a pammilin ti komision nga isubli ti P73.287 million confidential funds a rimuar iti Office of the Vice President idi tawen 2022, ken dagiti isyu a timmapaw iti liquidation documents, kas kadagiti acknowledgment receipts a naglaon ti maipagarup dagiti saan a masinunuo a nagan ken dagiti maipagarup anomalia nga immunan a naamoan iti imbestigasion ti Kamara
