LAOAG CITY – Rimmuar iti 2023 Annual Audit Report ti Commission on Audit (COA) para iti Department of Public Works and Highways (DPWH) ti P783,529,617.36 nga advance payments kadagiti kontraktor a saan pay a naabrot agingga iti maudi a paset ti tawen.
Dagiti pundo ket para iti 353 nga infrastructure project a naileppas, terminated wenno agur-uray ti terminasion ti kontrata.
Gapu iti daytoy, inpetteng ti COA a naglabsing daytoy iti Revised Implementing Rules and Regulations (IRR) ti RA No. 9184 ken mangitunda iti dakkel a pannakapukaw iti pundo ti gobierno.
Karaman kadagiti naduktalan ti COA dagiti sumaganad:
P388 milyon para iti 253 naileppas a proyekto.
P351.7 milyon para iti 94 a terminado a proyekto.
P43.7 milyon para iti innem a proyekto nga agur-uray ti terminasion.
Dagiti saan a naabrot nga advance payments ket mangipasimudaag iti pannakapaay a makissayan dagiti bayad a mangibilbilin ti 15% a reduction manipud iti periodic progress payments dagiti kontraktor agingga a naan-anay a mabayadan ti advances.
Karaman pay kadagiti isyu a naipalaon iti findings ti pannakapaay nga i-forfeit ti advance payment bonds iti oras ti terminasion ti kontrata ket ti kinakurang iti monitoring ken umiso a panagkissay manipud kadagiti billing ti kontraktor.
Saan pay a kumpleto ti accounting records ken dagiti pannakaitantan iti panagiproseso kadagiti claim ti kontraktor.
Uray dagiti saan pay a naabrot nga advances ket mangitunda ti dakkel a kantidad ti pundo ti publiko a saan a maus-usar ti gobierno para kadagiti dadduma a napapateg a proyekto.
Gapu iti daytoy, inlungalong ti COA a kiddawen ti dagus a panagbayad manipud kadagiti kontraktor wenno i-forfeit dagiti nai-post a bonds.
Masapol pay a rugian ti legal nga aksyon kontra kadagiti agkedked a mangisubli ti advances.
Naiget nga ipatungpal ti panangsurot iti IRR ti RA No. 9184 ken dagiti pagannurotan ti DPWH iti panangibabawi ti advance payments.
Rumbeng a pasayaaten ti monitoring mechanisms tapno masigurado ti umiso a pannakakissay ti advances manipud iti progress billings.
Masapol pay nga ipatungpal ti probisyon ti kontrata a mangipalpalubos iti panagkissay ti advances manipud kadagiti claim iti dadduma pay nga agdama a proyekto nga adda ti kapadana a kontraktor.
Kasapulan nga ipataw ti administrative sanctions kontra kadagiti indibidual a napaay a nangsurot kadagiti proseso ti panangibabawi ti advance payments.
Kabayatanna, inpasigurado ti liderato ti DPWH nga agtultuloy ti panangikarkarigatan da a mangsolbar ti isyu, karaman ti panangisyu kadagiti demand letters kadagiti kontraktor, pannakitinnulong kadagiti regional offices tapno ipatungpal ti koleksyon, ken panangiyuswat kadagiti legal n remedyo.
Iti baet dagitoy nga addang, inpetteng ti COA a kasapulan ti naig-iget a panangsurot kadagiti nayun a remedial nga addang tapno maliklikan ti ad-adda pay a panagngato ti saan a naibabawi nga advances.
