LAOAG CITY – Inpalubusen ti Commission on Audit a sumrek iti consignment agreement ti Laoag City General Hospital para kadagiti agas.
Segun ken ni Mr. Edgar Pascual, ti City Accountant iti lokal a gobierno ditoy siudad ti Laoag, 30 a porsiento manipod iti pakabuklan a regular budget ti nasao nga ospital ti mabalinda nga usaren.
Inbatadna nga ita a tawen ket adda ti pito a milyon a pisos a pundo ti ospital no sadino dua a milyon a pisos ti mabalinda nga usaren para iti daytoy a katulagan.
Inlawlawagna nga iti mabiit ket manamnama ti pannakai-deliver dagiti na-order nga agas para ita a tawen.
Kunana a napagnunumoanda a naimbag ti Commission on Audit maipapan iti daytoy a banag no sadino ket inaprobaranda ti pannakaipatungpal ti consignment system.
Immuna iti daytoy, nabayag a saan nga inpalubos ti Commission on Audit ken aminado ti mangidadaulo ti maseknan nga ospital a ni Dr. Marsha Lou Wafan a saan a kayat dagiti aglaklako ti agas a sumrek iti consignment agreement gapu ta adu pay ti saanda a nabayadan dagiti naal-ala nga agas.
