LAOAG CITY – Inrakurak ti Commision on Audit a gimmastos ti agarup P5-B ti Bangko Sentral ng Pilipinas para iti baro a Polymer Banknotes.
Basar iti ahensia, inaprobaran ti Monetary Board ti lima a kontrata iti suplay iti maikapat a quarter ti 2023 nga agbalor ti P4.98 bilyon para iti produksion dagiti baro a kuarta iti babaen ti New Generation Currency Series karaman dagiti denominasion a P1,000; P500; P100; ken P50.
Ti umuna a kontrata ket naipaay idi Hulio 13, 2023.
Ti maysa pay a kontrata ket naited idi Setiembre 28, 2023.
Idi Oktubre 19, 2023, ti kontrata para kadagiti suplay ket agbalor ti P2.6 bilyon.
Agpada a German company ti nakaala ti maysa pay a kontrata idi Nobiembre 16, 2023 nga adda ti pakabuklan a balor ti P3.718 bilyon para iti dua a kontrata.
Kinumpirmaran met ti Bangko Sentral ng Pilipinas a saan a karaman iti baro a polymer banknotes dagiti ladawan dagiti bannuar ti Pilipinas.
Tampok kagiti baro a bills dagiti ayup ken sabsabong kas ti Philippine eagle ken sampaguita flower iti P1,000 bill, Visayan spotted deer ken maysa nga endemic orchid iti P500 bill.
Naammoan a dagiti baro a bills ket agdama nga available iti limitado a bilang iti Greater Manila area ken manamnama agbalin nga available iti intero a pagilian inton Enero ti sumaruno a tawen.
