LAOAG CITY – Inbatad ni Atty. Juanito Antonio nga awan ti linteg a mangibaga a mabalin nga imbestigaren ti Commission on Audit (COA) ti Philippine Red Cross.
Daytoy ket gapu ta ti Red Cross ket maysa a Non-Government Organization (NGO).
Immunan nga inrakurak ni Presidente Rodrigo Duterte a masapol nga imbestigaren ti COA ti Philippine Red Cross.
Inpalgak ni Atty. Antonio a saanna nga ammo no nangalaan ni Presidente Duterte ti ideya a paimbestigar na iti COA ti maysa a pribado nga organisasyon.
Innayon na a ti COA ket maysa a constitutional body nga isu ti nadutukan a mangarisit ken mangkita no usto ti pannakagastos ti kwarta ti umili.
Kuna na pay nga awan ti karbengan ti presidente a mangmandar ti COA kas naiyataday iti konstitusyon.
