LAOAG CITY – Sinitar ti Commission on Audit (COA) ti Social Security System (SSS) gapo iti panaggatang na iti 143,424 rolyo ti tissue paper iti balor a P13.195 milyon idi 2024.
Segun iti komisyon, mangipakita daytoy iti nakapoy a panagplano ti ahensiya ken kunana a ti bilang ti nagatang a tissue paper ket nalablabes ngem iti kasapulan ti SSS para iti dua a bulan a suplay.
Inpetteng pay state auditors a gapo ti kaado ti nagatang a suplay ket saanen a makaanay iti storage facilities ti ahensya.
Dinakamat pay ti audit body a saan a nasayaat a naplano ti SSS ti panaggatang na iti ginasot a rolyo ti tissue paper no sadinno ti kantidad a nausar iti 143,424 rolls ket mabalin kuma a naipan iti benepisyo ti 2,000 pensioners ti Social Security System wenno funeral benefits para iti 650 a pimmusay a miembro.
ti nasao nga audit report din, kuna ti Commission on Audit nga agarop P3 milyon ti underpayment iti funeral benefits ti Social Security System.
Kuna pay ti COA nga adda ti sumagmamano a pensioners a pimmusayen nga agtultuloy a makaw-awat ti pension benefits manipud iti SSS, a nagresulta iti overpayment a P24.811 milyon.
Kabayatanna, maipagarop a nangipaay pay ti SSS ti cash incentives agingga iti P50,000 ti tunggal maysa kadagiti 6,525 opisyal ken empleyado, nga addaan ti kadagupan a P333 milyon iti babaen ti Prestige Award.
