LAOAG CITY – Naarestar ti maysa a lalaki kalpasan a naalaan ti paltog ken bala manipod iti bag na iti Laoag International Airport.
Nabigbig ti suspek nga agtawen ti 44, taga Dingras, Ilocos Norte ken cockpit operator.
Segun ken ni Police Capt. Roldan Banina, Officer-In-Charge iti Police Station iti Laoag International Airport, kabayatan ti pannakaipadalan ti bag ti suspek iti X-ray screening ket nakita nga adda ti arigna porma ti paltog isut gapuna a linukatan da daytoy.
Inbatad na nga iti pananginspeksyon da ti bag ti suspek ket ditoy a nakita da ti maysa a kalibre 45 a paltog, magazine ken walo a bala.
Kuna ni Banina, inadmitir ti suspek nga awan ti dokumento ti paltog na ken inpagarop na a ti naala na a case ket isu ti ayan ti kwarta nga usaren na nga agturong iti Metro Manila.
Innayon na nga aminado ti suspek a dakkel a kamali na ti panagikot na ti paltog nga awan ti umiso a dokumento na.
Mainaig iti daytoy, inpakaammo ni Banina a pinilaan da ti reklamo a panaglabsing iti Republic Act 10591 wenno Comprehensive Firearms and Ammunition Regulation Act ti nasao a suspek.
Nupay kasta, temporaryo a nawaya-wayaan ti suspek kalpasan a nakapagpiyansa iti 100 a ribo a pisos.
Kabayatanna, inpakaammo ni Banina a ti nasao a suspek ket agturong koma idiay Metro Manila gapu ta adda ti mapan da ilaban a manok idi naarestar iti Laoag International Airport.
