LAOAG CITY – Inpakaammo ni SFO4 Edison Reyes, mangidadaulo iti Bureau of Fire Protection iti ili a Piddig a dua a disso ti uram a napasamak iti coffee plantation iti Brgy. Estancia ili a Piddig.
Inlawlawag na a nangrugi ti dua nga uram iti asideg ti karayan a sakopen iti ili a Carasi agingga a nagramram ti apoy iti plantasyon ti kape.
Kuna na nga agarup maysa a turod ti nagbaetan dagiti dua nga uram iti nasao a lugar ken possible a tao ti nangaramid ti uram.
Segun kenni Reyes, kadagiti immunan nga uram ket dati a ti patta-pattaen da nga agaramid ti uram ket dagiti agkalkalap iti nasao a karayan.
Inpakaammo ni Reyes a maikapaten a daras a napasamak ti uram iti nasao a lugar ken kanayun a mangrugi ti uram iti asideg ti karayan a sakopen ti ili a Carasi.
Innayon na nga umabot ti 3 nga ektarya ti kalawa ti nauram a mula a kape iti nasao a lugar ken agtultuloy nga ad-adalen da ti balur ti nauram.
