LAOAG CITY – Inpakaammo ni Fire Superintendent Roxanne Parado, ti Provincial Fire Marshal iti Bureau of Fire Protection ditoy Ilocos Norte a naiget ita a banbantayan dagiti otoridad ti coffee plantation iti ili ti Piddig nga asideg kadagiti pakapaspasamakan dagiti uram.
Daytoy ket kalpasan nga addan ti report kadakuada nga isu ti maitudtudo nga adda iti likudan ti napasamak nga uram iti kabanbantayan iti Brgy. Estancia iti ili ti Piddig.
Segun kenkuana, maibasar iti insayangkatda nga imbestigasion ket ad-adda pay a napaigetan ti panagbantayda kadagiti masakup a bantay pakairamanan dagiti barangay officials.
Inbatadna a nasken nga ag-log-book dagiti amin a sumrek tapno adda ti pakalasinan no asino dagiti mapmapan kadagiti kabanbantayan.
Inlawlawagna a naiget ti panagkinnammayet ti Philippine National Police ken Bureau of Fire Protection para iti pannakaimbestigar ti nasao nga insidente.
Innayonna a dumanon ti nasurok 40 nga ektaria iti nauram a kabanbantayan no sadino karaman a nauram ket dagiti plantasion ti Department of the Environment and Natural Resources.
