LAOAG CITY – Dumanonen iti P888.7 million ti pakabuklan a nakolektar ti Banko Sentral ng Pilipinas iti babaen kadagiti coin deposit machines (CoDMs) daytoy.
Daytoy ket manipud kadagiti 214,475 transaction manipud kadagiti umili ti pagilian nga adda ti ur-urnunganda wenno iduldulinda a coins a kalikagumda nga ipasukat babaen iti coin deposits.
Iti agdama, addaan ti 25 coin deposit machine ti Bangko Sentral ng Pilipinas no sadinno kaadduan ditoy ket naiyestablisar kadagiti dadakkel a mall idiay Metro Manila.
Immuna daytoy a nairubuat idi Hunio 2023 iti gagaem a maminsan manen a maisubli iti sirkulasion dagiti coins ken malappedan a mapasamak ti coin shortage gapu iti panangidulin kadagiti coins.
Kabayatanna, inbatad ti Bangko Sentral ng Pilipinas nga adu dagiti agkainteres a mangisukat kadagiti baryada idinto a dagiti dadduma ket binulto nga agpasukat ti barya.
