Inbatad ni Award Winning film Director Melver Ritz Gomez a kasapulan ti collaborative effort tapno makabukel ti maysa a pelikula.
Daytoy ket kalpasan a nabukel da ti pelikula a napaulwan ti ‘Nagmanto’ babaen ti Pelikula Ilokana Film Production.
Segun ken ni Gomez, ti pakasaritaan ti ‘Nagmanto’ ket ti panagturong ditoy ni Maryana tapno adalen ken idokumento dagiti sumursurot a misteryoso a nakamanto a mapapati a nagbalin a bato.
Saan a nagpatingga ditoy ti kapadasan ni Maryana, gapu ta kabayatan ti panag-dokumento na, naibos ti baterya ti camera-na ket ditoy a naimatangan na ti naidokumento a kinapudno ken ti pudno a mapaspasamak iti likod ti camera.
Inlawlawag ni Gomez a ti pelikula ket nabukel babaen dagiti tulong ti sumagmamano nga indibidual, pakairamanan ditoy ti nagakem kas ‘Maryana’ a ni Genesis Duldulao ken Dan Lawrence Raguingan, ti Production Designer ti nasao a pelikula.
Mainaig iti daytoy, segun ken ni Genesis Duldulao, saan na a ninamnama ti panagakem na kas ‘Maryana’ ken inadmitir na a saan na nga ammo ti umno a pakasaritaan ti ‘Nagmanto’.
Kunana a manipud ubing daytoy ket passion na ti agbalin nga aktres ken makipaspaset kadagiti basic acting workshop, ken silulukat daytoy iti aniaman nga oportunidad a maipaay kenkuana iti panagakto.
Iti met biang ni Dan Lawrence Raguingan, ti production designer ti nasao a pelikula, ado dagiti karit a napasaranda iti pannakabukel ti pelikula, kas koma kadagiti maiyataday nga elemento, costume, no kasano nga i-portray ti maysa a karakter, cultural elements, ken dadduma pay.
Innayon ni Gomez a ti panagballigi ti nasao a pelikula ket resulta ti panagtitinnulong da kangrunaan dagiti talento a naipakita dagiti karakter ti sango ken likod ti camera.
Ginutigot na ti tunggal maysa a kitaen amin a pamuspusan tapno rumuar ken maipakita ti talento ken ti kabaelan nga aramiden ti maysa a tao.
Kabayatanna, nagyaman daytoy kadagiti amin a timmulong, pakairamanan dagiti miembro ti nagduduma a produksion ken isponsors tapno mabukel ti nasao a pelikula.
