LAOAG CITY – Maysa a college student idiay India ti nakagun-od ti world record kalpasan a nakaisurat ti libro iti uneg laeng ti siam nga oras.
Kinumpirmaran ti records keeping organization a Guinness World Records a ni Rajdeep Kashyap ti baro a record holder ti titulo a “Fastest Book Writing.”
Daytoy ket kalpasan a nakaisurat ti libro a ‘Jonmo Prem Mrityu – Kisu Byogyanik Kisu Aaloukik’ (Birth Love Death – Some Scientific Some Supernatural) iti uneg laeng ti siam nga oras.
Maysa a botany student ni Kashyap iti Nalbari College ken napanunutanna a gun-oden daytoy a world record idi madamagna maipanggep iti maysa nga estudiante iti Rajasthan a nakaisurat ti libro iti uneg laeng ti tallo nga aldaw.
Inbatad ni Kashyap, kaykayatna pay laeng ti agbalin kas botanist ket aramidenna laeng nga hobby ti panagsurat.
