LAOAG CITY – Inrakurak ni Commission on Elections Chairman George Erwin Garcia nga ad-adda pay a paigetanda ti panagbantay iti vote-buying ken selling kagiddan ti panangrugin ti local campaign period.
Inbatadna a namnamaenda nga umadu pay ti nasao a klase ti reports kalpasan a nangrugin ti panagkampania dagiti lokal a kandidato.
Inlawlawagna nga iti agdama ket awan ti nairekord a karaman a national candidates seknan iti vote-buying ken selling.
Inpasingkedna nga amin a reports a maipatulod iti komision ket insigida nga imbestigarenda.
Kunana a no kasapulan a madiskualipikar ken makasoan ti maseknan a kandidato a napaneknekan a naglabsing iti ipatpatungpalda a pagannurotan ket nakasagana ti poll body nga aramiden daytoy.
Naammoan a ti Committee on Kontra-Bigay ti poll body ti mangidadaulo iti panagbantay maipapan iti vote-buying ken selling ita a panawen ti panagkakampania.
