LAOAG CITY – Nakasagana ni Commission on Elections (Comelec) Chairman George Garcia a sangwen ti graft complain nga inpila kontra kenkuana ni dati a Caloocan representative Edgar Erice iti Office of the Ombudsman.
Segun ken ni Garcia, ninamnama nan ti nasao nga addang.
Dinakamat pay ni Garcia a ti panagpila ni Erice ti kaso kontra kenkuana ket mangiliklik ti atensyon manipod iti maiyus-uswat nga imbestigasyon ti komisyon iti mapukpukaw a minilyon a pisos a pondo idi 2016 polls ken ti kaso nga inpila ti US Department of Justice kontra ken ni dati a poll body chief Andres Bautista ken sumagmamano nga opisyal ti Smartmatic.
Maipalagip nga idi Agosto 20, nagpila ti graft complaint ni Erice kontra ken ni Garcia ken kadagiti miembro ti Comelec Bids and Awards Committee gapu iti panaglabsing ti Republic Act 3019 wenno ti Anti-Graft and Corruption Practices Act.
Inpetteng ni Erice a nagkamali dagiti opisyal ti poll body iti panangipaay ti P18 bilyon a kontrata iti South Korean firm a Miru Systems para iti Full Automation System with Transparency Audit/Count (FASTrAC) project para iti 2025 midterm polls.
Kuna pay ni Erice a ti Commission on Election ket saan a rumbeng a simrek iti baro a kontrata gapu ta mabalin pay nga usaren ti vote-counting machines manipod iti Smartmatic.
Ti Smartmatic, a Venezuela-based company ken ti service provider ti Commission on Elections sipud 2010 agingga iti 2022 epection.
