LAOAG CITY – Dandanin malpas ti Commission on Elections (Comelec) ti preparasyon para iti May 12 national ken local elections (NLE).
Inbatad ni Comelec Chairman George Garcia nga addan iti 90 agingga iti 95 a porsiento ti panagsagsagana ti ahensya idinto a dagiti miembro ti Board of Elections Inspectors ket dimmalan dan iti training.
Segun ken ni Garcia, nakasagana dan para iti balota no sadinno nga iberberipikar da laengen daytoy, ken ti Voter’s Information Sheet ket malpas a maimprenta intono Marso 25 ita a tawen.
Nagiwaras metten ti security forces ti Armed Forces of the Philippines ken Philippine National Police iti nagduduma a paset ti pagilian.
Kabayatanna, ginutigot ni Garcia ti publiko nga ireport dagiti kandidato nga aglabsing iti pagalagadan ti komisyon kas ti vote buying ken ti panagikabil kadagiti campaign materials iti saan nga otorisado a lugar.
