LAOAG CITY – Ginutigot ni Commission on Elections Chairman George Erwin Garcia dagiti botante nga agbalin a nasipot kontra kadagiti kwestionable a personalidad nga agpaidasig para inton 2025 midterm elections.
Inallukoy pay ti opisial dagiti botante a dagus a mangipila ti disqualification case kontra kadagiti saan a nasken nga agpailayon iti kangitingitan ti filing tapno makorehir ti komision wenno pannakakanselar ti kandidatura.
Iti kanito a malpas ti period ti panagipila ti kandidatura, awanen ti hurisdiksion ti Commission on Elections.
Kabayatanna, saan met nga umannugot ti Commission on Elections Chairman iti ideya a maipaayan ti discretionary powers ti poll body tapno aprobaran wenno pagkedkedan ti Certificate of Candidacy applicant.
Daytoy a rakurak ti Commission on Elections official ket kagiddan ti kontrobersial a pakairamramanan ni Bamban, Tarlac Mayor Alice Guo a manarimaan a maim-imbestigaran gapu iti mapagdududuaan a nasionalidad daytoy ken posible a Chinese asset kalpasan a nairaman ti naganna iti maysa a Philippine Offshore Gaming Operator firm.
Immunan nga inlawlawag ti Commission on Elections nga awan ti nangkarit wenno nangkwestionar iti kandidatura ni Guo idi nagpaidasig daytoy idi 2022 elections a nagbalin a rangtay tapno agbalin a Mayor daytoy ti Bamban.
Kabayatanna, naisubmitiren ti poll body iti Office of the Solicitor General (OSG) ti Statement of Contributions and Expenditures (SOCE) ni Bamban Mayor Alice Guo pakairamanan ti Certificate of Candidacy ken voter’s registration records-na.
