LAOAG CITY – Pinalagipan ni Atty. Alipio Castilo III, Provincial Comelec Officer ti Ilocos Norte, ti Philipine National Police (PNP) seknan iti no kasano ti panagserserbi dagiti pulis a “security” wenno “escort” dagiti opisyales ti gobyerno ita a nangrugin ti election period.
Kuna ni Castillo, manipud posisyon a bise gobernador agpababa ket maikkat pay laeng dagiti escort a pulis.
Kinanunungan met daytoy ni Police Supt. Randolph Beniat, Deputy Provincial Director for Operations ti PNP Provincial Office.
Segun ken ni Beniat, nagpatinggan itay tengnga ti rabii ti “duty” dagiti nasao a pulis ket agsublidan kadagiti “unit” a naggapuan da.
Nupay kasta, kuna ni Beniat a malaksid no agkiddaw dagiti maseknan ti “exemption” gapu iti pangta ti biag.
Kuna na a ti laeng aramiden dagiti maseknan ket agsurat da iti RGSCC ket ilawalwag da dagiti rason no apay a kalikagum da a pagtalinaeden dagiti “police escort” dagitoy.
Maipalagip a rugi ita nga aldaw ti Election Period para iti aggeddan a Barangay ken SK Election a no sadinno a maysa kadagiti pagalagadan ket ti pannakausar dagiti pulis nga “escort” dagiti pulitiko.
