LAOAG CITY – Masapol nga agbalin a napudno dagiti agpila ti Certificate of Candidacy (COC) na tapno awan ti rason a madiskwalipikar dagitoy.
Daytoy ti inbatad ni Atty. Julius Balbas, ti dati a Comelec Officer ditoy ciudad ti Laoag nga ita ket naiyakar iti ciudad ti Vigan.
Inbalakad ni Balbas a siguradwen dagiti kandidato nga usto amin dagiti insursurat da iti COC.
Inpalgak na a no saan nga usto ti ikabkabil ti maysa a kandidato iti COC na ket mabalin a madiskwalipikar, ken mabalin pay a sumango ti kaso administratibo wenno kaso kriminal.
Inlawlawag ni Balbas nga agdepende no kasanu ti kadagsen ti basol ti maysa a kandidato no sadinno a dua ti mabalin a pagbanagan ti kandidatura na, naan-anay a makanselar wenno madiskwalipikar.
Innayon na a no madiskuwalipika ti kandidato ket mabalin a masukatan ngem kasapulan a kapartido na met laeng wenno kaapelyido na idinto a no cancellation ti resulta ket saan a mabalin nga adda ti mang-substitute.
