LAOAG CITY – Inlawlawag ni Atty. Joel Ginez, ti supervisor iti Commission on Election ditoy probinsya nga adda laeng ti dua a lugar a mabalin a pagikabilan kadagiti campaign posters para iti mapaspasangasangan a Midterm Elections.
Inbatad na a dagitoy ket iti pribado a lugar ken ti pampubliko a lugar a naidesignar laeng para iti common poster area.
Kuna na a karaman kadagiti saan a mabalin a pagikabilan kadagiti campaign posters iti pampubliko a lugar ket dagiti pagadalan, merkado publiko ken dadduma pay.
Inpakaammo met ni Ginez a no iti pribado a lugar ket awan ti problema uray sadinno iti pagipwestoan basta adda ti pammalubos dagiti akinbagi.
Nupay kasta, inpalagip manen ni Ginez a maipawil ti agilansa iti poon ti kayo dagiti campaign materials.
