LAOAG CITY – Manamnama a resolbaren ti Commission on Elections (COMELEC) inton sumaruno a lawas dagiti apela dagiti naideklara a nuisance candidate.
Inbatad ni Commission on Elections Chairman George Erwin Garcia a tungpalenda ti nagbalin nga inkarida a leppasenda dagiti kaso dagiti nuisance candidates inton maudi a lawas iti bulan ti Nobiembre.
Kalikagumda a maipinal ti listaan dagiti kandidato pakairamanan dagiti nuisance candidate ken ti pagimprinta kadagiti balota inton bulan ti Disiembre.
Maipalagip a kadagiti naglabas nga aldaw ket adda ti 14 a kaso ti nangipila ti motion for reconsideration kalpasan a naideklara dagitoy kas nuisance candidate.
Immuna iti daytoy, adu dagiti nangbabalaw a kandidato ti panangideklara kadakuada kas nuissance isu a nangipilada ti motion for reconsideration.
