LAOAG CITY – Inpetteng ni Comelec Chairman George Erwin Garcia iti panangtratar ti Kamara de representantes ti Anti-Political Dynasty Bill, a masapol a nalawag, sigurado ken alisto a maipatungpal ti linteg a marepaso.
Gagem met ni Garcia a nasapa daytoy a mabukel tapno makakamat kadagiti mapaspasangasangan nga eleksyon.
Segun kenkuana, saan a rumbeng nga ikkan ti nalabes a kinawaya ti Commission on Elections iti interpretasyon tapno maliklikan ti pannakaulaw ken saan a patas a pannakaipatungpal.
Inpetteng ni Garcia a no saan a dagus a maipasa ti nailungalong a gakat ket maapektaran ti panagsagsagana para iti 2028 elections.
Inlawlawag ti opisyal nga adda laengen ti nabatbati a maysa a tawen ken innem a bolan sakbay ti filing ti Certificates of Candidacy isut gapuna a kritikal ti oras para iti voter education ken implementasyon.
Dinakamat na pay ti possible a conflicts iti penalties kas ti disqualification ken ti cancellation of candidacy.
Innayon na a mabalin a maaddaan ti loopholes no saan a naurnus ti pannakabukel ti linteg.
Iti pakabuklan, nagpanawagan ni Garcia nga aramiden a nalawag ken sigurado ti Anti-Political Dynasty Law tapno masigurado ti patas nga eleksyon ken maliklikan ti problema iti umay nga eleksyon.
