LAOAG CITY – Kinumpirmaran ni Atty. Julius Balbas, ti Commission on Election officer ditoy ciudad ti Laoag nga adda ti inpila ni Mayor Michael Marcos-Keon nga election protest.
Kuna na a daytoy ti naipalaon iti surat manipod iti Commission on Election – Central Office.
Inbatad na a gapo iti daytoy ket inmandar ti Commission on Election – Central Office nga ipreserba da dagiti election paraphernalia a naaramat iti napalabas a midterm election.
Inrakurak na a manamanama a ti sumaruno nga addang nga aramiden ti Commission on Election ditoy ciudad ti Laoag ket ti mangisumitir kadagiti election pharaphenalia.
Innayon na a kalpasan iti daytoy ket iyur-uray da dagiti sumaruno pay a pammilin iti Central Office da.
Mainaig iti daytoy, inlawlawag ni Balbas a basar iti pagannurutan ti ahensya ket masapol nga agpila ti maysa a kandidato ti election protest iti uneg ti 10 nga aldaw kalpasan ti pannakaiproklamar dagiti nangabak.
Kabayatanna, agpapan ita ket awan pay ti inparuk-at nga statement ti kampo ni Mayor Keon mainaig iti daytoy a banag.
