LAOAG CITY – Naiget a mangipatungpal ti Commission on Elections kadagiti pagannurotan para iti campaign materials iti babaen ti “Operation Baklas” kas panagsagsagana iti umas-asideg a campaign period a mangrugi inton Pebrero 11.
Inpetteng ni Commission on Elections Chairman George Erwin Garcia nga aktibo nga ikkaten dagiti local Comelec offices dagiti campaign materials a saan a sumurot iti umiso a rukod wenno panangipaskil kadagiti saan nga otorisado a lugar wenno puesto.
Mangipatungpal pay ti poll body ti naig-iget nga addang kontra iti vote-buying ken vote-selling.
Mabalin nga ipakaammo ti publiko ti insidente babaen ti panangipatulod kadagiti ladawan wenno bidyu iti Committee on Kontra-Bigay.
Naammoan a ti vote-buying ken vote-selling ket maibilang nga election offenses ken asinoman nga indibidual a karaman iti nasao nga aktibidad ket mabalin nga arestaren nga awan ti warrant-na.
