LAOAG CITY – Naiget nga ipawil ti Commission on Elections ti panagusar ti selpon ken panagala ti ladawan kabayatan ti eleksion inton Mayo 12, 2025.
Segun ken ni Mr. Robert Fernandez, Commission on Elections Officer iti ili ti Sarrat, maipalubos ti panangitugot ti selpon iti uneg ti polling precinct ngem naiget a maipawil ti panagusar daytoy kabayatan ti panagbutos dagiti botante.
Inbatadna a saan a mabalin nga usaren ti selpon a pagkitaan ti listaan nga ibutos dagiti botante.
Inlawlawagna nga imbes a ti selpon ti usaren para iti daytoy ket nasaysayaat laengen nga agitugot ti papel a nakaisuratan dagiti nagan dagiti kandidato a kalikagumda a butosan.
Mainaig iti daytoy, inpakaammo ni Fernandez nga adda ti tallo a kameng ti Electoral Board a mai-deploy iti tunggal polling precinct a dagitoy ti mangsipot kadagiti agsalungasing iti nasao a pagannurotan.
Kabayatanna, naammoan a no maduktalan ti maysa a botante a nagusar ti selpon ken nagala ti ladawan ti balota ket maibilang nga election offense kas nailanad iti Omnibus Election Code a sumango iti maiyannatop a pannusa.
Immuna iti daytoy, adda ti naawat ti Bombo Radyo Laoag News Team nga adda dagiti impormasion nga adda dagiti maipagarup a kandidato a gumatang ti butos dagiti botante ngem sakbayda a maala ti kuarta ket rumrummuar a kasapulan nga ipakitada ti ladawan ti balotada kas pammaneknek a dagitoy a kandidato ti inbutosda iti eleksion.
