LAOAG CITY – Nakairekord ti Commission on Election ti minor problem kabayatan ti pannakaisayangkat ti final testing dagiti automated counting machine iti ili ti Sarrat.
Segun kenni Mr. Robert Fernandez, ti Commission on Election officer iti nasao nga ili, naisayangkat ti final testing kadagiti automated counting iti 15 a pagadalan nga agserbi a pagbotosan dagiti botante intono lunes a pakairaman ti Sarrat National High School, Sarrat North Central School, Sagpatan Elementary School ken dadduma pay.
Kunana a karaman dagiti minor problems a nairekord da ket ti saan a pannakatnag ken mabasa ti balota, ngem nasolusyunan da metlaeng a dagus dagitoy.
Inlawlawag na a no maipanggep iti saan a matnag a balota ket naduktalan a saan laeng a nasayaat ti pannakaiplastar ti makina kasta met nga iti saan a mabasa a balota ket kinasapulan laeng a punasan iti scanner gapo ta natapok.
Inrakurak na nga awan ti rumbeng a pagdanagan dagiti umili iti ili ti Sarrat gapo ta saan a makaapektar dagitoy intono kaaldawan a mismo ti eleksiyon.
Inpakaammo ni Fernandez a karaman kadagiti nakipaset iti final testing ken sealing ket dagiti mangisursuro, kameng ti Commission on Election ken Philippine National Police.
