LAOAG CITY – Nangbukel ti taskforce ti Commission on Election (COMELEC) tapno imbestigaran ti panagadu ti bilang dagiti nagparehistro a botante kadagiti nagduduma a paset ti pagilian.
Inbatad ni Commission on Election chairman George Garcia, tingtingitingenda dagiti sumagmamano a lugar nga adda ti panagngato ti bilang dagiti nagparehistro para iti 2025 Local and National Election.
Inlawlawagna nga adda dagiti lugar idiay Mindanao a nakairekord ti nasurok nga 40 a porsiento a panagngato dagiti nagparehistro a botante.
Kunana a maysa kadagiti nakitana ket ti panagabuso iti panagusar ti barangay certificate.
Maipalagip nga iti dati ket masapol a mangitugot ti valid ID dagiti agparehistro ngem kinontra daytoy ti Korte Suprema ken kinunada a nasken nga uray barangay certificate ket mabalinen nga agparehistro.
Mangnamnama daytoy a maipayalisto ti maiyuswat a panangarisit ti task force tapno maiyurnosdan dagiti listaan dagiti botante agingga iti katapusan ti tawen.
