LAOAG CITY – Nangdutok ti Commission on Elections ti maysa a komite tapno adalen ti mailunglungalong a pannakaipawil ti panagusar ti artificial intelligence (AI) ken “deepfake” iti eleksion inton sumaruno a tawen, basar ken ni Commission on Elections Chairman George Erwin Garcia.
Nabayagen nga ilunglungalong ni Garcia nga ipawil kadagiti agbalin a kandidato iti eleksion ti 2025 ti panagusar ti AI technology ken deepfake gapu ta ti nasao a teknolohia ket ad-adda pay a mangpakaro kadagiti problema ti “fake news” ken disinformation iti pagilian nangruna iti panawen ti eleksion.
Inpetteng ti Election Chief a nasken a makita dagiti botante ti pudno a pakabigbigan ken imahe dagiti kandidato a saan nga agus-usar ti technological help.
Inbatad ni Garcia ti maysa a kopya ti pinirmaanna a Memorandum No. 2024-0795 iti Commission en Banc nga agkidkiddaw iti Committee on Environmentally Sustainable Elections.
Innayon ni Garcia iti maysa a text statement a responsibilidad ti komite ket konsultarenda ti publiko.
