LAOAG CITY – Inpetteng ni Atty. Joel Ginez, ti Commission on Election supervisor ditoy a no adda dagiti madamdamag a pannakaiyuswat ti vote buying iti maysa a lugar ket nawaya ti siasinno man a mapan agaplikar ti search warrant tapno adda ti mapan iserbi dagiti kameng ti Philippine National Police.
Inlawlawag na a no makumbinsir da ti judge nga adda ti maaramid a panagiwaras ti kwarta iti maysa a lugar ken ammo pay ti oras a pannakaipatungpal na ket dagus a mangiparuk-at daytoy ti search warrant.
Innayon na a no adda dagiti alegasyon a vote buying ket kasapulan a mangipila ti pormal a reklamo ken adda ti natibker nga ebidensya.
Reaksyon daytoy ni Ginez kalpasan a nakaad-adon dagiti agwarwaras a damag mainaig iti naparangarang a panaggatgatang ti botos dagiti sumagmamano a kandidato ditoy probinsya.
