LAOAG CITY – Agsagsagana ti Commission on Elections (COMELEC) para iti posible a legal challenge iti pannakaitantan ti Barangay ken Sangguniang Kabataan Elections (BSKE) a naituding inton Nobiembre 2, 2026.
Segun kenni COMELEC Chairman George Garcia, saan nga otomatiko a maisubli ti pannakaipila ti Certificate of Candidacy (COC) no adda mangipila iti petision iti Korte Suprema kontra iti baro a linteg.
Ad-adda pay a madanagan ti poll body iti posibilidad a mangipaulog ti Korte Suprema iti temporary restraining order wenno TRO a mabalin a mangapektar iti panagsaganada.
Impaganetget ni Garcia a saan a mabalin a basta maisubli dagiti nakansela nga aktibidad no awan ti nalawag a pagannurotan ken umdas a pakaammo kadagiti botante ken agtarigagay a kandidato.
Mainaig iti daytoy, luktan manen ti poll body ti voter registration manipud maikadua a lawas ti Nobiembre agingga iti Hulio 2027 tapno makapagrehistro dagiti baro a botante ken ma-transfer dagiti dadduma ti rehistrasionda.
Nagasto metten ti poll body ti Php 8B kas panagsagana iti naitantan ti eleksion.
Impasigurado ni Garcia a mailasin dagiti election paraphernalia, pakairamanan dagiti balota para iti masanguanan a pannakausar iti eleksion.
Malagip a pinirmaan ni Presidente Ferdinand Marcos Jr. ti linteg a mangyakar iti BSKE agingga iti Nobiembre 2028.
