LAOAG CITY – Possible nga agkurang ti oras iti Commission on Elections (COMELEC) tapno isayangkat ti Barangay at Sangguniang Kabataan Elections wenno BSKE intono Nobyembre 2 no ibilin ti Korte Suprema.
Segun ken ni Commission on Elections Chairman George Garcia, kasapulan paylaeng nga urnusen ti election calendar, karaman ti filing ti certificates of candidacy, information campaign ken deployment dagiti election materials ken vote-counting machines.
Kasapulan pay a maipaayan ti umdas a panawen dagiti botante para iti dissemination ti impormasyon sakbay ti eleksyon.
Kuna ni Garcia a narigrigat nga aramiden daytoy gapu ta kasapulan pay a maipatulod dagiti kagamitan kadagiti adayo a lugar, karaman ti sumagmamano a paset ti Mindanao.
Maipalagip a pagpalpalawagen ti Korte Suprema ti Office of the President, Senado, Kamara de representantes ken Commission on Elections iti petisyon a mangkweskwestyunar iti constitutionality ti Republic Act 12326.
Iti babaen ti linteg, maiyakar ti Barangay at Sangguniang Kabataan Elections manipod Nobyembre 2, 2026 iti maikadwa a Lunes ti Nobyembre 2028.
Inpasingked ni Garcia, a sumurot ti Commission on Elections iti aniaman nga agbalin a desisyon wenno direktiba ti Korte Suprema.
