LAOAG CITY – Saanen nga imandar ti Commission on Elections (Comelec) ti panagparehistro dagiti pribado nga account a mangiyendorsar kadagiti kandidato para iti 2025 national ken local elections (NLE).
Iti naiparuk-at a resolusyon, inamendaran ti poll body ti Resolution No. 11064 a mangibilbilin iti panagparehistro ti amin nga opisyal a social media account ken pages, website, podcast, blog, vlog, ken dadduma pay nga online ken internet-based a campaign platform dagiti kandidato, partido, dagiti campaign team karaman dagiti pribado nga indibidwal wenno entity, a mangiyendorsar iti pannakaatiw ti maysa a kandidato iti eleksyon iti sumaruno a tawen.
Nupay kasta, iti naamendaran a Resolution No. 11064, naikkat ti pannakaimandar nga agisumitir dagiti pribado nga indibidwal ti notarized affidavit nga agsapata a saan nga ilungalong ti saan nga usto a panagusar ti social media ken online a kampanya iti eleksyon, kasta met dagiti pannusa a maipataw para iti saan da a panagtungpal.
Intuding ti Commission on Election ti deadline ti registration intono Disyembre 13,2024.
Immunan a nangipatulod ti surat ti Makabayan bloc iti kamara de representantes iti Commission on Election a nangirakurak ti pannakaalarma da iti sumagmamano a probisyon ti Resolution 11064, karaman ti mandatory a panagparehistro ti social media accounts, websites, digital ken Internet-based campaign platforms dagiti kandidato, partido, ken dagiti supporters da a mangibagbaga a mabalin a makaapektar iti kinawaya ti panagirakurak.
