LAOAG CITY – Nagballaag ni Senate President Pro Tempore Panfilo “Ping” Lacson a mabalin nga adda ti malabsing a pagannurotan ti Commission on Appointments (CA) no bilang baliwanna ti opisial a rekord ti panagdengngeg idi Pebrero 4 a naglaon ti kontrobersial a rakurak ni Senador Rodante Marcoleta mainaig iti maipagarup a panangisuko iti Kalayaan Island Group idiay Palawan.
Inbatad ni Lacson, mabalin a sakupen ti falsification of legislative documents ti nasao nga addang no balbaliwan ti opisial a rekord ti panagdengngeg.
Adda ti maiyannatop a pannusa daytoy iti babaen ti Revised Penal Code of the Philippines partikular iti Article 170 kontra iti asinoman a mangbalbaliw kadagiti dokumento a lehislatibo nga awan ti naan-anay a pammalubos.
Inlawlawagna nga iti babaen ti Article 170, mabalin a patawan ti prisión correccional agingga iti maximum period ken multa a P1.2 milyon ti asinoman a mangbalbaliw ti maysa a gakat, resolusion wenno dagiti pinatibker nga ordinansa pakairamanan iti Kongreso wenno kadagiti lokal a konseho.
It agdama, nakapenpen pay ti mosion ni Marcoleta a baliwan ti paset ti rekord ti panagdengngeg ken daytoy ket naipatuloden iti Committee on Rules ti Commission on Appointments para iti panangtingiting.
Kabayatanna, inpeksa ni Lacson ti panagdanagna ken ni Senate President Vicente “Tito” Sotto III nga isu ti Chairman ti Commission on Appointments.
