LAOAG CITY – Boluntaryo a nangiparuk-at ti waiver ni Commission on Elections Chairman George Erwin Garcia tapno palubusan dagiti imbestigador a mangkita kadagiti bank records na.
Ti addang ni Garcia ket kalpasan ti panangibutaktak ni Sagip party-list Rep. Rodante Marcoleta a saan a nababbaba ngem P1 bilyon ti naiyakar manipod kadagiti bangko, karaman dagiti nakabase iti South Korea, agturong iti 49 nga offshore accounts a maikonkonektar iti maysa nga opisyal ti Commission on Elections.
Inpetteng ni Garcia iti exclusive interview ti Bombo Radyo, inaramid na ti nag-waive ti bank secrecy tapno saan a marugitan ti reputasyon ti Commission ken kayat na pay a paneknekan kadagiti kritiko na a nadalos ti record na ken saan a kurakot.
Malaksid iti daytoy, indatag payen ni Garcia iti National Bureau of Investigation (NBI) ti 49 a bank accounts nga inparuk-at ni Marcoleta.
Kayat pay a maamoan ti Commission on Election Chairman no siasinno ti akin-bank details kadagitoy ken no aktibo metlaeng dagitoy.
