LAOAG CITY – Inbatad ni Atty. Julius Balbas, ti Election Officer ditoy ciudad ti Laoag a simmurot dagiti kandidato kadagiti rukod ti poster ken naipan dagitoy iti common poster areas.
Segun kenni Balbas, kageddan iti rugi ti kampanya idi kalman ket nagsursur da met iti sentro ti ciudad ken awan met ti naglabsing mainaig iti daytoy.
Inlawlawag na nga isaruno nga imonitor dagiti dadduma pay a barangay tapno masigurado a masursurot dagiti amin a pagadalana ti komisyon mainaig iti panagkampanya.
Inpalagip na manen 2×3 feet ti nasken a rukod dagiti election paraphernalia, single man daytoy wenno grupo ti adda iti daytoy, ken nasken a maipan laeng iti common poster area.
Dinakamat na pay a mabalin met kadagiti pribado a sanikua wenno lote ngem masapol latta a masurot ti rukod na.
Mainaig iti daytoy, no adda dagiti aglabsing ket maisyuan ti chow cause order tapno agpalawag no apay a saan da a simmurot.
Kabayatanna, innayon na nga intono Oktubre 27 ket adda ti Operation Baklas nga iyuswat ti Commission on Elections.
