LAOAG CITY – Imbestigaren ti Commission on Elections (Comelec) no dagiti 15 contractors a nagidonar para iti panagkampanya dagiti national candidates ket nakaala ti kontrata iti gobierno sakbay wenno kalpasan ti May 2022 elections.
Ummunan nga inbatad ti komisyon a dagiti contractors nga addaan ti government contracts ket maiparit nga agidonar kadagiti kandidado.
Segun kenni Comelec Chair George Garcia, kayat da nga ammoen no dagiti kontraktor ket addaan da ti kontrata iti gobierno idi nagpila dagiti pulitiko iti kandidatura da wenno kalpasan ti eleksyon ket nakaala da ti kontrata.
Inlawlawag na a kalpasan a makita ken maadal da amin a listaan ket suratan da ti Department of Public Works and Highways tapno maamoan no iti dayta a gundaway ket addaan da ti kontrata.
Inbutaktak pay ni Garcia a nabigbig da dagiti 15 a kontraktor a nangipaat ti donasyon wenno suporta iti kampanya iti 2022 elections candidates.
Nupay kasta, im-imbestigaren da pay laeng no amin dagitoy a kontrator iti gobierno.
Mainaig iti daytoy, kunana a posible a manayonan pay ti listaan dagiti kontraktor nga iggem da gapo ta ti pay laeng nakita da ket dagiti nagdonar kadagiti national national positions ken saan da pay a nakita ti local level.
Innayon na a pagsasaritaan dan to pay no anya met ti sangwen dagiti kandidato nga immawat iti donasyon nangruna ket awan ti pagsungbatan dagitoy iti linteg no legal ti nangipaay.
