LAOAG CITY – Nadismaya ni Commission on Elections Chairman George Erwin Garcia kadagiti politiko nga addaanen kadagiti poster iti kalsada ken dagiti adda commercials na iti TV, radio wenno social media uray no saan pay a nangrugi ti election ken campaign period.
Segun ken ni Garcia, saan a saklawen ti agdama a linteg ti pagilian ti premature campaigning, kayatna a sawen, awan karbengan ti komision a mangpasardeng dagitoy nga aktibidad gapu ta saanda pay a naibilang a kandidato ti Korte Suprema ken maaddaan da laeng ti bileg inton Enero 12 wenno apaman ti panangrugi ti election period, idinto a mabigbig laeng dagiti politiko kas kandidato iti umuna nga aldaw ti campaign period inton Pebrero 12 para iti national elections ken Marso 28 para iti local level.
Gapu iti daytoy, nagpalagip ni Garcia kadagiti politiko nga ‘i-take it easy’ da, gapu ta maikkanda iti 45 nga aldaw wenno 90 nga aldaw nga agkampania.
Kabauatanna, rinugian met ita nga aldaw ti Commission on Elections ti panagimprenta kadagiti nasurok a 73 Million a balota iti National Printing Office, Quezon City para iti 2025 election.
Malaksid iti daytoy, inruar metten ti komision ti ballot face template wenno ti langa ti balota a mausar iti overseas voting ken local absentee voting.
Ti timeline ti komision para iti panagimprenta kadagiti balota ket manipud Enero 6 agingga Abril 14 wenno 77 nga aldaw sakbay ti eleksyon isu a puntiria ti komision a makaimprenta iti nasurok a 800 a ribu agingga iti 1 milion a balota iti kada aldaw.
