Kinondenar ti Commission on Human Rights ti maysa nga ordinansa ti maysa a barangay idiay Bangued, Abra a mangitantandudo iti death penalty kas third offense iti illegal a panagibelleng iti basura.
Iti statement ti Commission on Human Rights, saan da nga ibilang ti kastoy nga ordinansa nangruna iti karbengan ti tao ngaa agbiag a sinaruno ti pannakaikabil ti tarpaulin a mangipakpakita iti ladawan ti paltog a mangipasimudaag iti pannakapapatay wenno ipapatay kas dusa.
Segun iti komision, babaen ti nasao nga ordinansa ket mamulta dagiti aglabsing iti ordinansa iti P1,000 gapu iti umuna a panaglabsing, P1,000 ken 8 nga oras a panagserbi iti komunidad iti maikadua a panaglabsing ken mapaltoganda iti maikatlo a panaglabsing.
Gapu iti nagduduma a kritisismo iti ordinansa ken tarpaulin, ket nasuspenso ti 6 nga opisyal ti Barangay Calaba idiay Bangued iti 90 nga aldaw.
Inwaragawag ti Commission on Human Rights a nupay bigbigenda ti kinapateg ti umno a panangtarawidwid iti basura ken ordinansa a mangpasayaat iti aramid ti panagibelleng dagiti umili iti komunidadda, kinunana a saan a masolbar daytoy a kita ti naranggas a direktiba ken pannusa, imbes ketdi mangparnuay daytoy iti riribuk ken distress kadagiti hurisdiksion.
Impalagip pay ti Commission on Human Rights kadagiti opisial ti barangay a dagiti ordinansa iti lugarda ket masapul a maitunos kadagiti linteg ti pagilian ken respetuen dagiti napateg a karbengan ti tao.
Impaganetget pay ti Commission on Human Rights a maiparit ti dusa nga ipapatay iti sidong ti Konstitusion.
